من قد ايه يا "سمعه " ما ضحكناش
على بقك الواسع
وعيونك المدهوشين
من قد ايه يا "سمعه " وأنت حزين
ودنيتك غنيوه مش خايله
منولوج مكعبل
مرسوم عليك بالظبط
زى الأوان الجريح
قولى صحيح .. !"؟
" تبقى فين هى السعاده " ؟
" كلنا عايزين سعاده "
كلنا عايزين نشوفك ،
بتلبس الحرميه برميل الخشب
وبتحدف الدنيا الكئيبه ،
بالبيض والطماطم ....
علشان ما بتضحكش
وانت اللى ديما مبتسم
زى طاقة شمس ،
تصدق انك جميل !
وان صوتك بيطرب !
تصدق ان الكلام لسه شباب ،
ومش باين عليه السن !
وانك صبى فـ القلب والضحكه
هو ......
هو بعينه بغباوته ،
يوم عبيط
بتعيط فيه على باب المسرح
وترمى عليك الدنيا ضحكتها
ولا بتضحك ..... !
وتحاول الأيام تزغزغ فيك
ما تتحركش .... !
طب مره واحد ،
كان بيحب الناس قوى !
راح حاضن الهوا .
طم طرا رارم ... طم طم
............
مره واحد
من كتر الضحك
كانت الأحزان بتخاف منه .
طم طرا رارم ... طم طم
...........
مره واحد
كان بيضحك طوب الأرض
حب يضحك روحه ... عيط .
طم
طرا ..... رارم
طم ....
طم ... .
2 التعليقات:
هايلة وجميلة اوى
ياترى ليه حزين ... وبنحاول تضحك نفسك يا سمعه
إرسال تعليق