‏إظهار الرسائل ذات التسميات عربيه كارو ... محمله كراكيب. إظهار كافة الرسائل
‏إظهار الرسائل ذات التسميات عربيه كارو ... محمله كراكيب. إظهار كافة الرسائل

الاثنين، 26 ديسمبر 2011

بقـجـه


الموت .....

مش موت ولا حاجه

ولا حلم ها يخونك ،

ولا أنسى ها يخوفك

يمكن ها تصعب عليه

ودمعته بتحن وهو بيموتك

والقبر ايه ؟

القبر جنه صغيره

القبر صندوق ستى فى المندره

وانا كنت متحير !

الموت بيجى ازاى ...؟

اتاريه خفيف ،

زى النسيم والطل

بيحط ويا المواسم وبيقطف الحبات

وتشوفه عينك وأنت متغمى ،

زى ضى نهار

يلعب مع عيالك فى صحن الدار

ويركبك مراجيح وبيطوحك

تمسك فى أيد الريح

كأنه صديق ،

ومن زمان يعرفك

الموت حنين ...

زى خالتي " سعاد "

يرقيك .. رقوة الوالدين ,

فـ عز الضنك

ويميل على الجته

ويحضن .. حضن !

ديماً مسافر ....

يلم ورد الروح فى بقجة سفر،

ويسلم الأحباب لموجة حزن .

احكيلى يا محمد


الى المناضل الجميل : محمد مصطفى

وصديق العمر / محمد بهاء

كان ايه ف قلبك وانت رايح هناك ...؟

و قولت ايه وانت خارج للعيال فى البيت ؟

بصيت لمين فيهم وخفت على بكره ؟

و عرفت تفلت من حضنهم !!

عملت ايه فى الخوف لما عض القلب؟

وازاى يا صحبى

سرقت روحك م الدفا المستكين

للميدان البرد !

وازاى غناوى الناس التضمت مع بعض

سبحة ولى

وانت المريد اللى بيصرخ م الوجع والوجد

احكيلى يا محمد

عملت ايه فى الضل اللى شبط فى الروح

وازاى رميته على طول دراعك

وانت مش همك

قولى صحيح

يلى انت نايم فى المسا

تحت نار الوقت

يلى انت رافع غنوتك

وسط الميدان للعِلم

يحلم بأيه اللى كان نايم

فى قلب الحلم ؟

احكيلى يا محمد ...........

تين الغلابه


يا تين الغلابه يا جميز يا عال

يا شهد ومكرر بطعم الحلال

يا وردى ف توبك زبونك قليل

لكنك مسكر ف بق الفقير

بتحلى وتحلى يا جميز اصيل

يا تين الغلابه يا جميز يا عال

رخيص ف حالك بشروه وطوره

دوا للمفلس ف عشوه وفطوره

تحلى اللي مرر فـ دنيا غريبه

يا تين الغلابه يا جميز ياعال

يا طايب بقالك سنين ع الشجر

نداك الطيابه وريقك عسل

يقولك زمانك .. سنين لم تمل ؟!

تقوله تخيل .. وعندي أمل

وطرحك علالى ولا فـ يوم يميل

مخاوى الشجر يا بن عم النخيل

فـ جرحك حلاوه وفرحك قليل

يا تين الغلابه يا جميز يا عال .

ابن اليومين

الى : يوسف

نايم بيضحك فى اللفه

ريحة العيال المولودين

بتهل م الجنه

يناغى ع الدنيا بالسؤال البرئ

ايه اللى جابنى هنا

أنا كنت فين قبله .. !؟

وهى ... تتبسم بوشها الطازه

و تسيبله جنب السؤال وردتين

للصبر والحيره

واقفين نطل عليك نتأملك يا جميل

شايل ملامح مين

يا جديد على الدنيا ؟

افتح عنيك للشمس

واضحك لها

أسئل ..............

ولا تهاب الأجابه و مرها

أهلا وسهلا بيك

أعرفك يا ابنى

الصبح .... قسطين لبن مدلوقين

الشمس ... مشمشه طابت فى قلب السما

الناس .... غياب وحضور زى أيامك

والبوسه ... طعم الحنان اللى ما شافه حد

خدها على جبينك

وفى السبوع تتهز فى الغربال

ريحة فرح وبخور

بيرفرفوا مع بعض

وانت اللى تضحك وتبكى

من غير ولا سنه

كتكوت بيغرق......

وسط الفرحه والدهشه

اهلاً وسهلاً بيك ... فى دنيتنا .



خريطة مصر لحم ودم


نهار طالع يكمل لبسه فى الشارع

وجى يقوم ويتكفى :

- دا من امتى .. وكان ازاى ؟!

دا كان بيواعد الميادين .... ولا بيوفى

وتالت تبته كان فى حضنه بيغنى

شجى .... لا ناى ولا غيره

وقبضة ايده وعروقها اللى منفوضه

على باب النهار بيدب ويرزع

مثبت نفسه فى الصوره ... عشان يطلع

"ولا عمره هيهرب تانى م النيجاتيف"

ويدخل جوه تكوينة بشر هادر

خريطة مصر لحم ودم

بتتحرك ... وغضبانه

يا فرج الله

دا مين يا اخونا دا اللى هناك

دنا عرفه

اتارى صوته كان رنان ومش عارف

اتارى الكلمة مشبوكة فى شمس نهار

ومش شايف

دا مين يا اخونا دا اللى هناك

دنا عارفه

المستبد ... الجميل ... صاحب الشارع

اللى الندا اتوحشه و باس جبينه

لما نام فى الطل

و حاله كان غريب جداً

سعات يفرح .... سعات زعلان

يخونه الدمع وبيبكى

جنازه مشيعه الطغيان

وجى الموت وبيخايل قصاد عينه

فيضحكله ...

ايا غفلان .... يموت ازاى

وهو بينفض الأكفان .

تاريه قبل المعاد حاضر

وكان قبل الصباح موجود

نهار طالع يكمل لبسه فى الشارع

وجى يقوم ويتكفى :

- دا من امتى .. وكان ازاى ؟!

............

اكسر الوجه الزجاجى


المترو .............

دوده بتحفر فى العتامه نفق

تربه بتجرى فوق شريط الكهربا

تاكل عيالها وتهرب فى الجحور

لو كنت شاعر بالملل

كسر الوش القزاز

واضغط زرار احمر

هتكلم السواق

- يا عم

عارف السكه ولا هنعرفك

بقالنا ساعه فى النفق

الهوا هنا معطن

والناس دى متكرره

وانا غريب عن دى البلد

ياعم انا غلطان

ايه اللى سيبنى العمار والنور

وجابنى تحت الأرض

افتح بيبانك بقى

يتفرفطوا المحابيس

...........

كسر الوش القزاز

اضغط اليد لأسفل

تفتح بيبانك بأيد

ايه بقى .....؟!


قاعد بلف الدنيا فى سجاره

والهبو طالع ... تقاسيم ....

تقولشى مزيكه ..... !

افتح ممالك .... واهد حصون

خيالاتى فبريكه

اربع شبابيك بشيش

انفتحو فى دماغى

الدنيا ع البحرى

والهوا زماره فى ضلوعى

حتى كمان استكتروا ع الغريب الغياب !

يوم ما انفتح باب ......

كان للمذله

وبالواسطه .................!

ادينى فقت ..... ! ؟

ايه بقى ؟

عايزنى اغنى للنجوم

ولا القمر ع الخرابه

وجته خرسا بين سنان الديابه

ولا الحنين اللى طاير فوق مداينها

يوم لما شافنى

شبه عليا ولا عرفنيش

ادينى فقت ..... ! ؟

ايه بقى ؟

مين اللى بعد الخراب

طالع يلم الخرز

دا الشاعر اللى م الفجيعة انخرس

حين ما فتح دفتره

كان انشطار الراس

كام الف ورده يا شاعر

ماتوا فى الكراس !؟

الطير بينعى ..... والجوقه بتغنى

والبومه فوق تلها قاعده بتتفلسف

الله ... اعد .. يا سلاااااام

هاتولى ايدى التانيه وانا اسقف

ادينى فقت ..... ! ؟

ايه بقى ؟

يبليك.... بحبة جهل

وقسوة قلب .. وغباوه

علشان تعيش وقتك

انظر بعينك ... واعطف بقلبك

ولا تعدمك مفهوميه

فى يوم غبا مدوحس

طالع نهار

ماسك ف طوقى يهزنى

لم فقت من وهمى

الشمس طاله ... صحيح

بس فوق دمى !

ادينى فقت ..... ! ؟

ايه بقى ؟

نايم بقالى ميت سنه

ولا حاجه فيتانى

حتى الهدد هواه ولم ينقام

وانا فى وسط الكلام

من كتر احزانى

حاوى ومخاوى

و اضم عودى

و اضرب مقام الصبا

بأيد واحده .

ادينى فقت ..... ! ؟

ايه بقى ؟

شادر بطيخ


أخضر ومدور يا حلوله

متغطى بالليله العتمه

جوا الشادر مرصوص رصه

ما تشوفشى العين إلا البطيخ

بطيخ ... بطيخ

نازل يدئلج ع السكه

لو يتململ تلقى الشماريخ

بتلب على الجته الخرسا

والراس التقاله الصلبه

بتسلف بعضيها سكاتها

يا أخضر غامق ديماً و حزين

يا حمار وحلاوه وع السكين

يا حلاوه وع السكين

واقطع ........ .

لو عنده عيون

كان شاف وبكا

لو عنده لسان كان يتكلم

لو جلده المخدر الناعم

عنده الإحساس كان يتألم

لكنه يادوب كده ع الصفين

يركن فـ دماغه ويتفكر

يفلقوا فـ دماغه كده نصين

يشربوا من دمه المتسكر

يا اخضر ..

غامق ...

ديماً وحزين

يا حمار وحلاوه

و ع السكين

يا حلاوه و ع السكين

وأقطع ........... .

ما اقدرش اقول امتى...!


ما اقدرش اقول امتى ....!

لكن هاييجى.... والقمر تلتين

والعشب شايل ريحة وطعم الأرض

له خروشه .. ونعومته زى القطيفه

نايم على ضهرك ووشك للسما

للنجوم ..... طلة ضيا باهت

نور المجره مش بديل شمس النهار

لكن رمادى كفايه

علشان تحس بالتوقيت

جاى من ألف عام ضوئي

ميلادى او هجرى لازم يمر الوقت

ما اقدرش اقول امتى

لكن هاييجى

والقمر.. زى ضافر نور بيخربش العتمه

سواد منقرش بالمجرات والسدو

ساعتها يبقى للسما ضفتين النهر

وعيل يحدف كل نجم ف مطرحه

" بحرفنه" تلمس نجومه كام مره وش السما

قبل ماتنفجر

عن نور عفى جدا ... بيقطع اللوحه

البرق ... كرباج السما

الرعد ... جمال الصيف

بتجرى ورا جمال الشتا

و العشب شاب تحت منك

تلمس بأيدك تجاعيده فى لحم الأرض

تعمل بتتصعب عليه ...

لكن فى سرك بتحمد ربنا ... ألف مره

إن السما ما فيهاش مرايه .

بوكيه


الوجه ده محتاج لأغنيه

تضحك وتبكى

وتتونس بصحبه وناس

شايل براءة طفل منسيه

و عنفوان الصبا

وروعة الإحساس

يضحك بسن الحياه

معانى يتزقطط ......

شمس الصباح .. والمطر

وعيال شقيه ... وحبيبة ع الكورنيش

يبكى بدمعة زى موجه قريبة

تخدك بحنيه

سقا .. وشقا التراحيل

وناى بيشكى الحال

نغم دافى وحزن شفيف

الوجه ده محتاج لأغنيه

"عباس.. صيام .. أو جحا "

والدنيا مش هيه ... !

يوم ما انطرد م الجنة قام يصرخ

جيلك .....

"جيلك يا عدويه ...."

قبل الحروف ما تدل ع المعنى

وجهه يسمعنا ،

سيكا وصبا ونهوند

صياد فرح

والضحك صفصف ع النحيب

يخطف بشارة أمل

قبل النهار ما يغيب

والإنسانية يا صحبي فى أوان معيوب

عربيه كارو محمله كراكيب

شيله وهبده من مطب لمطب

كل الحاجات الطيبه بتنحب

كل الحاجات الطيبة محجوزة بالمتاريس

و لأني معجب قديم ،

لملمت صحبة معانى ويا ورود

مع ناس بتشبهلك ،

و فى الوجع زيك

نهديك بوكيه الورد فى الكواليس .

جى المطر


بتخافوا ليه م الرزاز الرقيق

تداروا ليه تحت التند ..

والبلكونات ........

متقنفدين جوا البلاطى

والشيلان الصوف

افتح زراير قميصك

واستقبله زى عاشق

خليه يحسك يغسلك

جى المطر

يرسم حدود البيوت

ينقش لها ضلها

ينقر قزاز الوحده

ويخاوى الندى

جى المطر

علشان يرجع للطريق

حاجه من زهوته

وحته من وشه القديم

يبتسم بيها ........

كتر خير الدنيا


نور البتارين مش خايل

والصبح بيطلع بعد محايله

والناس .... والسكه القياسه

رايحين .... جيين

والوقت .... انا مش عارف ،

رايح على فين ؟

انا شارع زهقان ....

بتطل عيونى المفتوحه ،

على ضى ميدان

بعد البغدادلى وشبابيك التلى

بيبص علىّ شيش الحزن المتعفر

بتراب الذكرى

وبيوت ضهرها للدنيا

ومن البلديه .. رحمان يا رحيم !

حتى النخلات اللى فـ قلبى ،

طالعين تنظيم ...!

والتلتوار اللى فـ جنبى

ما رسيش على بر

متبلط حبه ... متكسر حبه

مش عارف نفسه .. !

سلم .. ولا خرابه.. ولا رصيف ؟

وكتر خير الدنيا

والزمن البارك على قلبى

جزم المخاليق نحلت ضهرى

جايز قلبى هلكان م الحزن

ولا الناس آمات طرابيش ،

خطوتها أحن ...؟

لبروجى الزحمه نفير ..

ساعة ما بيزعق ..

والناس يا فكيك .....!

بالوش الكركم

والنفس المكروش

والخطوه المحتاره فـ سكتها

ومفارق عز الضهريه

تضرب لخمتها ........

واهو لولا الأيام الحلوه

ويافطه نحاس ع الناصيه

وعمود التلغراف ، وعماره يتيمه

وصور التوغرافيا

أنا كنت اتوه عن نفسى

وأضبش كل صباح ،

على بال ما اعرفنى

وماحدش ابداً كان يفهم

حنية قلبى اللى ما توصف

على حبيبه يخطفوا لمسه

ورا ضل عمود

اتبرجل خالص واتلخبط

يتكهرب قلبى المتسفلت

تحمر خدود اشارات الشارع

انا شارع ... زهقان

بتغمض اخر شبابيكى

على اخر ضى عمود

ولا يبقالى غير لسعة برد

وصفير الوقت

اللى انا هتجنن واعرف

رايح على فين ....!؟