‏إظهار الرسائل ذات التسميات يا عم يا بّنا. إظهار كافة الرسائل
‏إظهار الرسائل ذات التسميات يا عم يا بّنا. إظهار كافة الرسائل

الأربعاء، 21 ديسمبر 2011

للــــورد


يا ورد ليه مستكين

دا الشوك بقى للحلق

امتى الربيع يغضب

يبقاله رعد وبرق

* * *

صبحت ع الورد فتح

رد الصباح بالهمس

الزهر غاوى غزل

والشوك يحب اللمس

* * *

الورد صابح بيبكى

يا ورد ليه مقهور ؟

يا خلق ما تعقلوها
بقى للجناين سور !

* * *

الورد ساب الجنينه

الورد بره السور

وادى اللى طالل علينا

جى الربيع مهجور

* * *

الورد مش ورد لأ

دا الورد ده كداب

انت الجميل يا رب

ومسبب الأسباب

* * *

الورد ما بيكدبش

الورد عمره ما خاف

ليه انكسر ما عرفش

يعنى عشان شواف ؟

طعم الحديت


بعد الوطن مش ألمنى

منا بعيد وأنا فيه

بس اللى حازز ف روحى

وطنى يروح " منا فيه "

* * *
فدادين كلام يا جدع

والصدر متعبى

بايت عليل بالناس

والقلب " يتعب بى "

* * *

ولا دمعتى مصبرانى

ولا ضحكتى م القلب

مين اللى عكر زمانى

نار ف الحشا والقلب

* * *
ألضم حبابى سبح

عاج كهرمانى يسر

ف الضى قلبى سبح

ف العسر جانى اليسر

* * *
كان صبح أبيض شفيف

منه تشوف بكره

بكره اللى باين له طيف

بندهله قال ... بكره

***

نخله أصيله انتنت

فعل الهوى غدار

وقف العويل ينتظر

نصيبه ف الجمار

خد م الدنيا منابك

فرح وقيراط وجع

حزم روحك بهمك

واتمايل يا جدع

* * *

ادعى يا رب الخلايق

يجى الفرج تسعد

لو تستعين بالخلايق

ف القله راح تغرق

* * *

كل اللى بيا مشيئتك

مبسوط حزين صرت راضى

كل الخلايق بحاله

وغلبت ف الناس أراضى

* * *

نازل فى بحر المعانى

واللولى كله فيه

وصاف فـ أنوار حبيبه

جاله النبى يمليه


* * *

يا روح وبعدك روح

يا ضى خلفك ضى

قلب الوطن مجروح

ما ينجرح غير حى

يا عم يا بّنا


يا عم يا بّنا

والطوبه على طوبه

يحكم عليك العويل

تنهد بالطوبه

* * *
يا عم يا بّنا

قولى بنيت كام بيت

مايل صحيح حالنا

وف البنا عليت
* * *
يا عم يا بنا

ليه البنا مايل

اعدل دماغك يا جدع

أصل الدماغ مايل

* * *
بنا وقاله أبوه

روح ابنى دار للكل

الكل قامو خنوه

يبنى وضهره انحل

* * *
يا عم يا بنا

سرقوك ما تعلمشى ... ؟

أعلم وساكت أنا

من قهرى ما بنمشى

* * *
يا عم يا بنا

ابنى لنفسك بيت ॥

يقول ॥ ما انتو السكن

انتو الوطن والبيت

بنا وغلبى محاوطنى

تحتى ومن فوقى

نزلت أرمى الأساس

ردمو التراب فوقى

* * *
بنا وراح غربه

يبنى بيوت للخلق

راجع بلا هدمه

ولا لقمه سدت حلق

* * *
يا عم يا بّنا

يا مِرَسِى فى العتبات

تبنى بيوت وقصور

وفـ الخلا بتبات

* * *
بنا وعلم بكاه

ع الخد مجرى نهر

موال حزين يا غناه

والصبر جاب الصبر

* * *
ضحكو عليك ف الحكاوى

أبو زيد وقال عنتر

أبوك يا واد اللى فارس

بس فـ زمان اخبر