‏إظهار الرسائل ذات التسميات دموع حضرتك. إظهار كافة الرسائل
‏إظهار الرسائل ذات التسميات دموع حضرتك. إظهار كافة الرسائل

الأربعاء، 21 ديسمبر 2011

غنوة شط وحيد


متفرقين

زى الجزاير فى البحور

كل واحد موج وشط

كلنا فى البعد مد

واللى فرق بينّا خوفنا

وارتيابنا فـ بعضنا

موج بياكل فى شطوطنا

......... ونبتعد

ريح تطوح فى جزوعنا

......... ونرتعد

واحتمالات الفراق قبل اللقا

خوف بيتربص بنا

واحتمال انك تغنى

يبقى صوتك ناى حزين

تسمعه لوحدك وتبكى

واحتمال انك تصالح دنيتك

ازاى وفين

وانت رافض للتمنى

والسما تضلل علينا

غيم وبرق

يولد الرعب فـ عنينا

ألف سكه ... نتوه ونرجع

مش لبعض

ما احنا برضه لسه بينّا بحور وشط

......... يا سفاين ضى عدى

وابعتى قارب نجاه

يا منارات الحقايق

شاورى لينا بالحياه

علمى قلوبنا الوحيده

ازاى تغنى

علميها ازاى تبوح

لملمى شطوطنا اللى بعدت

زى لملمت الجروح


فخ


كل المعانى الجميله

محبوسه فى العبارات

حتى البحور شطين

حدين لموج عاتى

وبلاقى نفسى وحيد

مملكشى غير قلمى

وصفحه بيضه مسطره

اكتب ... واكتب

لحد ما شح المداد

خلص الورق منى

وكلامى مكملشى

مين اللى حط الحدود

حتى لبياض الصفح ؟

هامش يضيق على كل أحلامى

واقف على حدود الورق

دا سلك شايك وبعده ليل غميق

يا ليل ......... ما كفنيش البياض

ولا صدى الغنوات اللى بغنيها

شالتنى م الوحدة

وبتستحال السطور سجنى وقضبانى

وانا اللى ساذج

وقال ......... بغنى للعصافير

علل




الوطن اللى بتحبه خريفه طويل ؟

الناس سايبه الكورنيش

وبتتمشى على شريط القطر ؟

جاهين على أعتاب الحياه

راقص باليه فى منتهى الخفه ؟

أحسن من مفيش


وعشان تعيش

كل حاجه لما تحصل

تبقى أحسن من مفيش

لحد ما انت

انت نفسك فى الحياه

تبقى برضه

حاجه أحسن من مفيش

قرار


رغم الهدد

نطلب وما يجيش المدد

رغم العيال مش شبعانين

نظرة عنين بتهزنى

رغم الهموم

رغم المهانه كل يوم

رغم الحبيبه بتهجرك

رغم الوطن بيدارى وشه

ويلفظك

عارى الجسد

أحبى إلى اخر شعاع

وادفى بيه

وبص منه ع الطريق

واصرخ فى ابنك

اللى لسه ما شفتهوش

غصبن عن الناس كلها

صمم تكون إنسان


الاستماع


طظ ... وشكراً


ببريزه كرامه

وبشلن لبان كلام نتايه

وعقال وطربوش وغطره

ها تستوعب الموقف

وتحتوى المسأله

وبتبقى واحد

" أسفه عميق "

هامش البيان النهائى

... بكره

... عشان

... آسف

... يحكى

... ضربوا

... معلش

... اشمعنى

... يا ولاد الـ

... عيال

... سا

... عيط

... بيان

... معرفش

... فش

... طب طظ

وشكراً

رسمتي


ورسمتنى ع الرمل عيل

ورسمتنى ع الرمل شب وعجوز

المد باس الشط

ملس على خده الحرير

سبح على كفوفه

المد يمحى رسمتى ويرحل

المترو


المترو كان

دوده بتنخر فى الجسد


بعد انتظارك


تكلك وتهرب فى الجحور


على خوانه



( 1 )

الليل يحاوط خصرك اللين

ويكتف الدرعات بعنف

ويغلفك سلفانه بفيونكه

وبدون مناسبه

يقدمك للريح هديه

( 2 )

وانا يعنى ملزوم كل يوم

أخدك لمشوارك

قهوه فى باب اللوق

تشرب دموع ساده

ولأى عابر سبيل

بتكرر الحكايات

معقول


معقول

كل كلكسات العربيات

دى علشنا

أنوار الشارع والأفيشات

اعلان شايل صورتى وصورتك

إيدى فى إيدك

والزفه طالعه من المترو

ولأول مره بشوف الناس

فرحانه بجد

وفرحنا فى ميدان التحرير

ليله لحد الصبح

يحييها

" عمرو دياب " و" حليم "

معقول

أنا مش جنبك فى الكوشه

معقول

انا سايب كل الهيصه

وقاعد على الكورنيش الظهر

بقزقز لب ... لوحدى

مسألة وقت


البحر مش قدى

فـ الإنتظار والبوح

ولا ذروة الفوران

واقف على شطه الحزين

صدعت كل الودع

بوشوشات الأمانى

ضج الودع منى

هجر الشطوط

وفتنى غرقان فـ انتظارى


مفروض


مفروض الدنيا


تحدد موقفها


يا تمطر


يا تطلع شمس جديده


متكنشى بتاعت امبارح

الحصه الأولى


يا ولاد

من زرع

بيفضل يزرع وخلاص

دمياط ورشيد

دمعات بتروح ع المالح

وانا مش مصرى ولا عربى

أنا شبساوى أو منجاوى

انا واحد مش قادر يستحمل منكم

نظره الاستغراب

أصل انا مش ناقص غربه

والجرس اللى انتو بتستنوه

علشان يفصل بِينّا

مش فاصل

أنا لسه عليكو الحصه التانيه

ها ادخل لابس واحده

واسمى " الأبله منال "

يا ولاد من زرع

بيفضل يزرع وخلاص

......... دمياط ورشيد

دموع حضرتك


من فضلك ......... ؟

أنا آسف

دى أول مره

بوقف فـ الشارع حد مهم

انا معجب جداً

بالمقالات اللى فـ الصفحه الأولى

بدلتك المكويه بحرص شديد

مفاتيحك ومدليتهم

ياما نفسى فـ مفتاح منهم

......... أنا عارف

وقتك ما بيسمحشى برغى كتير

لكنى يا فندم

ماشى وراك من ساعه

بلملم فـ اللى بيتسقط منك

اتفضل .... دموع حضرتك

الاستماع