‏إظهار الرسائل ذات التسميات حال الجناين. إظهار كافة الرسائل
‏إظهار الرسائل ذات التسميات حال الجناين. إظهار كافة الرسائل

الأربعاء، 21 ديسمبر 2011

ساب الجنينه


ساب الجنينه ما حبهاش

ومقلناش ايه السبب

الورد طار ويا الفراش

بقت السما الوان عجب

لبلاب وزاحف ع الحيطان

هربان من السور الحديد

يا مين يقول للفجر بان

الورد عايز يوم جديد

فايت عيدانه للخلا

جاب الخريف قبل الأوان

ف الصبح قام يبكى الندى

ويفيد بأيه كان اللي كان

ساب الجنينه وضلها

الورد مل اللإنتظار

طول عمره شارب مرها

ولا دقشى منها غير عكار

. ساب الجنينه

وهايبقى شجرة


.... يا للعجب

ازاى نشيدك للربيع

وتموت مكتئب

شفتك بترمى ورا ضهرك الخلئات

خلق الميدان واقفه بتتفرج

مجنون ده… ولا عقل

ازيد من اللازم

ايه اللى كان مفروض

ايه اللى كان لازم

قدمك تغوص فى الأرض

جدرك لسابع أرض

تفرد دراعك

وتتبسم لقرص الشمس

انا هابقى شجره

وهتخرج من تحت باطى فروع

ومن سعتها عرفتك

لما تتألم بتطرح برتقان

قدام خضار عودك

المتبت ع الورق

وقف الخريف عا جز

الفرع ده زهزه قوى

باين عليك مبسوط

ما تخدنى جنبك …ف باطك

نفسى انغرس جارك

يمكن اتعلم

ازاى اطرح ورود


حوض الورد


لجل زيارة " سيد بيه

زرعوا الورد

بس الورد حزين ومغمض

وطى دماغه ورافض يضحك

رافض يشهد زيف اللحظه

، لو با للأيد … كان يسحب عوده

……… ويطلع يصرخ

، فتوح بيه " قال ما يصحش "

لازم كل الورد يفتح

لازم كل الورد يصحصح

شد دماغ الورد بخيط

لازم كله يشب لفوق

لجل زيارة " سيد بيه " كل الورد صبح مشنوق

النــــــــدى


الورده بتقول للندى

يرضيك كده … ؟

بتندى صبار الغيطان

… وتفوتنى أنا

جوفى يأن من العطش

أشبع من الريح مطوحه

خايفه يا صاحبى لأنحنى

تدبل فروعى وتنتنى

اميل على تراب الجنينه

يضمنى

رد الندى … يا طيبه

… بكره النسيم هيزفلك

منى القبل

ويزهزه الضحكه اللى غابت،

من زمن … بس اصبرى

اوعاكى م الميل اثبتى

الاستماع


و ف كل يوم

حال الجناين يختلف

عود ينقطف

ينحط زينه فى الفازات

بيعه رخيصة ف بترينات

يدبل هناك

وبعدها يجى الندى

يرقرق دموعه ع الأزاز

مذكرات خيال مآته


يوم مازرعنى جوا الغيط

كنت بخوف ف العصافير

يوم ما فردلي دراعي

كنت مفكر اني ها طير

لكن يوم عن يوم اكدلي

شجر السنط الواقف جنبي

اني مليش غير بس مكانى

وان شوال الخيش على كتفى

مش جناحات

عدي وفات ايام و مواسم

احسد فيها ضلى الراسم

مني حاجات

اصله ساعات بيغيب

لما تغيب الشمس

ولا يبقالى الا سكاتي و بس

نزلت مطره بلت جوفى

قلب الطينه بيسحب عودى

بردك واقف ما اتحركتش

واللى اتحرك عصفور زقزق

جه وادارى عند القلب

جوا ضلوعى فرش القش

زقزق…… دق

يومها وصاحبى

حس بأني مش للغيط

… وان سكاتي

كان مصاحبني ع الوطاويط

، شالني رماني

تحت السكه

فوق السكه

جنب الصفصافه على الترعه

من ده بكره

لفم بيا عيال الناحيه

لحد ما واحد منهم مره

جه على وشي بقلمه البوص

ورسم ضحكه

خدتها منه

ورحت مكركر