مكركـب فـ روحك
ودنـياك زحام
وقلبك يـادوب ،
مطرحين مدهوسين !
فـ وسع لنفسك مكان للحياه
وطل علينا بشباك وحيد
تشوف المعانى ام جد وجديد
بيكيا ......... بيكيا ..
الحاجات القديمه ..
اللى ماليه البيوت ،
اللى زاحمه الأماكن
نشيل النجف والتحف ،
و الدولاب القديم .
فونوغراف لجدك ،
وصورة حبيبتك
بدورق إزاز ،
السرير الحديد
الطشوت النحاس ،
بلعبه بلاستك .
وأيامك اللى ما تعرفشى حد
طفولتك ... وعقدك ،
مرايه قديمه وملت ملامحك
بـ " شكوكو " لعبه .
بيكيا ........ بيكيا ،
الأوان المصدى ،
الصحاب الأونطه ،
الوشوش الخشب ،
نقشقش بواقى الحياه والفضل
بيكيا .. بيكيا
غناوى صبابا قديمه بنكله
ما تعملشى قلبك بتارين قزاز
بقية حياتك تقضيها فرجه
ولو تحتفظ بأنتيكه جوه فـ قلبك
تموت ....... !
يوماتى هفوت رغم برد الشتا
أخلى مطارح فـ قلبك فضا ،
لنسمة هوا أو لشمس النهار
وادينا بنرزق .....
بيكيا ....... بيكياااا .
0 التعليقات:
إرسال تعليق