بكتبلك من قبل ما تكبرى
وتبصى ع الدنيا بعين الجد
حاولى تكونى صغيره
على قد ما تقدرى
واتعلمى ف الكلام
على أقل من مهلك
ما أجمل التهتهه على شفايفها
بنت التلت سنوات
بتعلم العبارات برائتها
سلمى سلام القلب
هىّ دفا الأيام وبهجتها
هىّ حبيبة قلب جدتها
لما تصلى تشد طرحتها
ولما تسجد ......... سلمى بتسبح
بعترتى اشيئنا القديمه كلها
خرجتى قلب الأوضه ف الصاله
عملك م الورق جدو
سفينه وبيت وطياره
ولو تقعد على السفره
تبعتر ع الملايكه الرز
شقاوتها ترقص قلب جدتها
من الفرحه
وبتغمض عيون سلمى
عشان ها تنام
وبرضه شقيه ف الأحلام
بتبقى سلمى نجمايه
بتلعب ويا كام نجمه
يشب الضى والقمره
يشوف بسمه ِ،
ما بيشفهاش على الدنيا
ف بيصحبك ......... يبوس خدك
ويعمل نفسه بلونه ما بين كفك
وتبدء لعبه القمرايه والنجمات
مع بنت التلت سنوات
ومين يقدر يقولك
إكبرى دلوقت
كده إنت ملكتى الوقت
كده إنت ملاك دلوقت
إوعاكى زى الدنيا متسربعه
حاولى تكونى صغيره
على قد ما تقدرى
واتعلمى فـ الكلام . على أقل من مهلك
0 التعليقات:
إرسال تعليق