رسم الطباشير

فى المدرسه

والعيال ع الدكك

زى اللعب مترصصه

والفصول زحمة عقول

والواجب كان

كراس مليان

كلمة بكره

مكتوب بالنسخ وبالرقعه

والحصه تاريخ

لكنه تاريخ اليوم

مكتوب ع الحيط أرقام

والواد فى الصف الأخرانى

حاضن درعاته ونام

وبيحلم إن الدكه صاروخ

والشنطه كتاب حواديت

وانه ها يرجع تانى البيت

من غير ما يعدى على خرابه

بالطباشيره بيملا الحيطه كتابه

وبيرسم شجره ونخله وغيط

وحاجات كان نفسه تكون

......... ويا ريت

صندوق مليان بلعب وبالون

زى ما بيشوف فى التليفزيون

وبيرسم بكره خطين بيض

ومابينهم سكه

لفرحه وعيد

ولسه ها يشب ويطلع

بيلاقى الخرزانه تلسوع

على ظهره

وبسرعه بيفوق من حلمه

فى المدرسه ......... رن الجرس

فرق الصراخ م الخرس

والمدرسه حبلت عيال

والمدرسه ولدت عيال

حضنوا الشوارع

والبيوت لسه على حيطانها

. رسم الطباشير