عربيه فول

وأخيراً …… بلقيك

بعد ما دوخت عليك

فـ كل القطر المصرى

بتسيب الدنيا تضرب تقلب

واقف تفطر

" على عربيه فول فـ " الموسكى

سبحان من جمع دى المخاليق

حولين عربية فول

وكأنه مقام سيدنا

بِتدش دماغ البصله

دماغ الدنيا اللى معانده

تمزع فـ رغيفك نصين

ويلهلب طبق الفول

بهارات الهند …… شطه وفلفل

يولع جوفك بالآه فتأن

ويسموه الناس الفن

… عيبك

إنك ضابط ساعتك ع الدنيا

فـ الوقت اتأخر بيك

من غير جمهور ولا حاجه

تقفل ستارتها الدنيا عليك

ولساك بتشخص

دور المهزوم والشاعر

مع إنك مش مكتوبلك دور

واهو لينا زمان

بندور ليك على صوره

! وما نلقيهاش

" ديماً تظهر ف " الكدر

" وتهرب م " النيجاتيف

يظهر إنك مش موجود من أصله

واهو كل الورق اللى اتحبر

ومليته كتابه

مفروش تحتيك

قراطيس للب

بتلمع بيه فترينه قزاز

جواها البدله البنى

البدله البنى …… فاكرها ؟

واهو طبق الفول قرب بخلص

وانت ما نطقتش ولا كلمه

شايفك زعلان

… ياخى سيبك

ملعونه الدنيا

ايه يعنى لو خدت نشان

ما هو كله محصل بعضه

أنا جيت اطمن بس

" وامضى " أوتوجراف

أتأكد انك موجود وبخير

… واهي فرصه

اخدلك صوره

يمكن تطلع