الجمعة، 10 يناير 2014



قبل القصايد


كل الحروف متعلقه ع الشجر                                      
بتميل وتطوح ........
والكون فراغ من أوله لأخره
وليله ونهاره بلا أوصاف
والشمس تطلع  ،
 تنور اللي اسمها دنيا
تتمنى تلمح ضل لأي شئ موجود
الأرض تمشى وهيه واقفه مكسوفه
و ملخبطه الأوقات  .......

وبعد كام مليون سنه
يخرج بن البشر
من كهوف ضلمه ،
زى بطن الحوت
يجمع ف قوته .... ،
 ويرعى فى الخيال والخوف 
يمد أيده يقطف الكلمات
يعرف الأسماء
وينادى على روحه
فيرجعله صدى ،
يشرخ سكات وحدته
لملم فروع الكلام  ف ليلة شتا
ورماها وسط النار
طاب الكلام ....
فداقوا ..... واستطتعم ....
من يومها ما بطلشى
يرغى .... ويسئل
وينشد قصايد وجع
تحت نور الشمس .  


تمثال  ثورة خيال : د . هشام عبد الله 
 


السبت، 2 نوفمبر 2013

النشيد

انا لما غنيت النشيد فى المدرسه
كان الغنا
لعيال بتلعب فى الحوارى الضيقة
لنيل دموعه مفضضه
لحبيبه عبرت فى الوريد
يا كدابين لسه الوطن
لساه بعيد ..........
مش ده الوطن اللى غنتله النشيد .

************
صيف 1995
***********

الجمعة، 9 أغسطس 2013

كل اللى بيا



كل اللى بيا مشيئتك

              مبسوط حزين صرط راضى 

كل الخلايق بحاله   

          وغلبت فى الناس اراضى



السبت، 9 يونيو 2012

فضلة خيرك ...فل


خارج وعليه سهم الله
وبتكسر عينه شمس الناس
فيبص لتحت
رجليه فى الروبه لحد الركبه
الفل ... عديل الفل ... بن الفل
" الجيل التالت من أولاد الحرميه "
شجرة عيله
سلسال نهيبة قوت
الفل أسير ....
كاره حرية غيره
مستنى الكرباج يفتح عينه
ويعلم ضهره ..
فبريكة قهر .. بعيد عنك ......
وشعاره ... " الصدغ أحسن من عزبه "
قدام موكب سلطان
خلبوص بيورق لعوالم زفه
لا هو راجل ولا ست
ولا يشبه للبنى ادمين
واهو راكب ......
إن عدت .... سالم
و إن خابت ......
اهو لابد للمره الجايه
ثورة ايه .. !
حرية مين يا ولاد الـ....
أديله رغيفه ومعاه الجزمة
تلاقيه مبسوط والمعده بتهضم
القوت والاستعباد
فضلة خير الطواغيت
أوغاد ............

الجمعة، 18 مايو 2012

انا لست شريرا ....




ما ذنبى
يستدعينى الطاغوت فى ليلته المؤرقة
فأقص عليه بعضا من ملحي الغرقى بالدم
وسيد الطواغيت ...ذو الحس المرهف
ينام بين يدي كطفل

لنا لست الشرير هنا
انتم ....اجهل من دابة
لو كنت تفكر كاللص لحميت البيت
لو كنت تفكر كالداعر لحميت العرض
الرجل الأمني ....يسخر منك
كل قناعاتك ..فرضا لا يعنيني
موتك ....يبدو مصادفة وكذلك شح الأقوات
الحد الأدنى من يأسك صنع يدي
أكفر بالوطن الآن أمامي
تخرج وسوستى من صدرك
فأنا الصوفى الدموى القاتل
والرسل تموت .... وأنت كذلك لا ضير
الشرفاء ليسوا للأرض ....أولى بهم الله


هو ذا المنطق ...
ولك الجوع والجب ....
يا من تتغنى بالأوطان
الوطن يا حمقى .... فرضية وهم
لا رفرفة لراية لا انفخ فيها
هو ذا المنطق
وانا ...........
لست الشرير هنا

الاثنين، 26 ديسمبر 2011

طالب مقام


واقف بيسألها

رايحين لفين الخلق دى كلها ..؟

المدنه شاورت ع السما

وعرايس الزاويه بمهابه بتصلى

والشارع المعدول على قبلة الجامع

شاهد عـيان دامع

ع المدبحه الكبرى

دم المماليك

شربات سبوع ابن الخديوى سعيد

تاريخ ومش راجع

لكنه ناحت ملامح وشه على كفوفك

تهرب ملامحك لفين ..؟

طالع لابوك او جدك

برضو حواجبك تقيله

وتزك فى المشيه

تختم ف اخر ركعه

تحضن ايديه وتلحق البركه :

- حرماً يا عم نجيب

كان وشه بينور

يمشى ف شوارعنا زى طيف قلقان

يبص ف وشوشنا ويتعجب ...!

يا قوة الله ...!!!

احباش ... وترك ... وجراكسه

جلبان على عربان

طبق سلطه إنسانيه وماشى ف الشارع

الحى ده ...... كان قصرى

والشارع الواسع .. صفين بساتينى

وخيلى يرمح هنا ... تكعيبه على نيلى

من اعلى مدنه ف بلدنا

ما تجبشى اخر موكبى

ف الحاشيه والفرسان

قال الكلام ده مين يا ترى ؟

مجذوب ف خرقه

رافع عصايته .... طالب مقامه

ف قلب الشارع العريان .

نص باره


بنص باره .... هنلعب البابه

اراجوز خيال الضل

ازميل مدقدق ،

بينقش على صدر المسا حواديت

اهون عليا ابلع الحنضل ...!

و لا اقول كلام ساكت

ضل الحروف .. ولا ضل قصر الأغا

والخوف عواله و صنعة المحابيس

اسود .... مغشلق ..... ضلم

افتح ستارتى التقينى عريس

خايل ف توب العزه والبغدده

اقفل ستارتى التقينى تعيس

وسط الكآبه وهدمتى مرقعه

رقعت توبى من فضلة المخاليق

وكل رقعه لون وقفشه بتضحك

هيسخطوك يا قرد ...!

القرد اهوه بيضحك ....!

فى يوم غطيس زمهرير

الحكمه نامت جنبى فى ضل الموت

بنص باره ....!

والف ليله النهارده

ملفوفه ف حرير الشام

تحت الغلاله غلمان كتيره وجوارى

وحمارين ... وتنابلة السلطان

حدوته فتحت باب على الدنيا

كوز ميه بارد زلال

من ايدين سقا

ونكته من بق المشايخ

فى رواق الشام

والنكته فى ايدين الحزين كرباج

داير يلسوع فى الهوا

بنص باره

هيلعب الدبوس

وتدوس مع الدوسه

تمشى فى موكب خليفه

ترقص على المقسوم

بنص باره يا جدعان ....!

اراجوز خيال الضل تعبان م السفر

قراقوش امر

اتاوه على راس الحمير

على الهوا والموت

طب طز فيكم بقى... ظزميت مره ؟!

لا حمار ولا عيشه ولا سحتوت

ولا حتى موت بيحل .. ويستر الجته .

علامة تعجب


دا عقرب وداير على الأسئلة

دا ننى وشايف

بعينه الوحيده ... حاجات مقلقه

دى دمعه وطالعه على صفحه بيضا

بعكس اتجاه البشر كلها !

وصعلوك مشرد وساند كتافه

على سطر مايل.. من المضبطه

دى شومه بتضرب على دماغ سؤال

دا حشرى ... وانفه فى قلب المحال.

علامة تعجب فى سجن افتراضي

ومسجون وهارب من الأسئلة.

سبـاحه


يمين.... شمال...... بانتظام

تقطع مسافه ومش مهم

للخلف او للأمام

... و انت على وش الكلام

تحدف دراعك .. كأنه مش منك

ووش الميه زى وش الضيف

تفتح جراحه وتطيب فى نفس الوقت

ازاى ما حدش قلك ..... !

والبحر بالليل مرفرف

زى راية خطر

يخدك على قد عقلك

ويشد فيك للغميق

ازرق غطيس ... فى الليل يميل للسواد

وانت الوحيد اللى المسافه

علشان خاطر غرورك

مش عايزه تنهيله السباق .

مسألة وقت


البحر مش قدى

فـ الانتظار والبوح

ولا ذروة الفوران

واقف على شطه الحزين

صدعت كل الودع

بوشوشات الأماني

ضج الودع منى

هجـر الشطوط

وفاتنى غرقان فـ انتظاري

مش واحده ست


ولا صبيه على مشربيه بقلل

ولا واحده لابسه توب

من زهور واعلام

هى لقليل الكلام

دمعتين دفيين

رايحين على المالح

باى باى


وانا داخل المـترو

الباب قفل على جتتى الخرسا

نصين بروح رايـح ...

واحد فـ قلب المـترو

والتانى واقف ع المحطه وحيد

عينى فـ عينه

شاورت للنص اللى راكب من بعيد

وعملت له ..... بـاى بـاى

وقلت ف عقل بالى :

مش هايوحشنى .

عباد الشمس


اسكت .....!

مش عباد الشمس المهموم

ملواش بوذه يمة شمس اليوم

على غير العاده ... ولوحده !

كان غيط عباد الشمس

واقف بيبص لبعضه

واما اتأكد ان ملامحه تمام ،

تشبه للشمس

على غير العاده .... ولوحده !

كان غيط عباد الشمس

بيميل ....

وبيقطف بعضه .... .

نوفل


اسكت .....!

مش نوفل مات

زينة صبوات الحته

ابو عين مفتوحه على الدنيا

الواد من خيبته يا عينى

كان طالع يستنى الصبح

اتاريه كان صبح عجوز ومهكع

طالع يتعكز ع المخاليق

قام دهس الواد....

وامه الفرحانه ..

واقفه توزع شربات

ـ نوفل مات يا وليه

ـ لأ ......

نوفل راح للشمس عروسته

هيه اللى احن عليه م الناس ..

من يومها وفـ كل صباح

الديك يدن

وامه ترقع زغروده لأخر الحى

علشان عقبال عندكوا يا حبايب

الواد نوفل ..

اتجوز قرص الشمس

وراح من وش الدنيا

بعد ما لحسه الضى .

إمام


اسكت ......... ؟!

ولا كان مجنون ولا حاجه

دا يدوب الضى يشق العتمه

يتوضى بقول ندعة ندا ،

وبينزل جرى ....

قدام لمة ورد ف اى جنينه

ينوى .....

ويقيم الفجر الحاضر

يحازى الورد يترصص

تميل الصحبه ويا الريح

تقول ااااامييييين

وبتسبح .

يصلى بيه ويتركع .

حجاب بالمحبه


اسكت ....... !

مش طلعت عملاله عمل

منقوع فـ مورد

مزنوق بين شق الحيطه وقلبه

ورشه على العتبه مية وفق

اتاريه ..... !؟

كل مابيشوفها يعيط قلبه حنين

ويشابى عليها زى عيال اليتم

من هفة توبها ربيعه يهل

يتغرق قلبه ضى وياسمين

يقطع من ضعفه القوه

ويسند روحه ..

لحد عتبها المرمر

ويقف يتأمل .

ولا حس بروحه ......

الا ساعة صبحيه

وهي ف حضنه ... وعيل بيصحيه

والتانى يشد فـ شعره ،

ويفتح ف عنيه

اتاريه . .

كان شق الحيطه وسع

ودخّل نور على قلبه

والعمل انفك .... وقراضه بتاكل فيه .

بقـجـه


الموت .....

مش موت ولا حاجه

ولا حلم ها يخونك ،

ولا أنسى ها يخوفك

يمكن ها تصعب عليه

ودمعته بتحن وهو بيموتك

والقبر ايه ؟

القبر جنه صغيره

القبر صندوق ستى فى المندره

وانا كنت متحير !

الموت بيجى ازاى ...؟

اتاريه خفيف ،

زى النسيم والطل

بيحط ويا المواسم وبيقطف الحبات

وتشوفه عينك وأنت متغمى ،

زى ضى نهار

يلعب مع عيالك فى صحن الدار

ويركبك مراجيح وبيطوحك

تمسك فى أيد الريح

كأنه صديق ،

ومن زمان يعرفك

الموت حنين ...

زى خالتي " سعاد "

يرقيك .. رقوة الوالدين ,

فـ عز الضنك

ويميل على الجته

ويحضن .. حضن !

ديماً مسافر ....

يلم ورد الروح فى بقجة سفر،

ويسلم الأحباب لموجة حزن .

احكيلى يا محمد


الى المناضل الجميل : محمد مصطفى

وصديق العمر / محمد بهاء

كان ايه ف قلبك وانت رايح هناك ...؟

و قولت ايه وانت خارج للعيال فى البيت ؟

بصيت لمين فيهم وخفت على بكره ؟

و عرفت تفلت من حضنهم !!

عملت ايه فى الخوف لما عض القلب؟

وازاى يا صحبى

سرقت روحك م الدفا المستكين

للميدان البرد !

وازاى غناوى الناس التضمت مع بعض

سبحة ولى

وانت المريد اللى بيصرخ م الوجع والوجد

احكيلى يا محمد

عملت ايه فى الضل اللى شبط فى الروح

وازاى رميته على طول دراعك

وانت مش همك

قولى صحيح

يلى انت نايم فى المسا

تحت نار الوقت

يلى انت رافع غنوتك

وسط الميدان للعِلم

يحلم بأيه اللى كان نايم

فى قلب الحلم ؟

احكيلى يا محمد ...........

تين الغلابه


يا تين الغلابه يا جميز يا عال

يا شهد ومكرر بطعم الحلال

يا وردى ف توبك زبونك قليل

لكنك مسكر ف بق الفقير

بتحلى وتحلى يا جميز اصيل

يا تين الغلابه يا جميز يا عال

رخيص ف حالك بشروه وطوره

دوا للمفلس ف عشوه وفطوره

تحلى اللي مرر فـ دنيا غريبه

يا تين الغلابه يا جميز ياعال

يا طايب بقالك سنين ع الشجر

نداك الطيابه وريقك عسل

يقولك زمانك .. سنين لم تمل ؟!

تقوله تخيل .. وعندي أمل

وطرحك علالى ولا فـ يوم يميل

مخاوى الشجر يا بن عم النخيل

فـ جرحك حلاوه وفرحك قليل

يا تين الغلابه يا جميز يا عال .

ابن اليومين

الى : يوسف

نايم بيضحك فى اللفه

ريحة العيال المولودين

بتهل م الجنه

يناغى ع الدنيا بالسؤال البرئ

ايه اللى جابنى هنا

أنا كنت فين قبله .. !؟

وهى ... تتبسم بوشها الطازه

و تسيبله جنب السؤال وردتين

للصبر والحيره

واقفين نطل عليك نتأملك يا جميل

شايل ملامح مين

يا جديد على الدنيا ؟

افتح عنيك للشمس

واضحك لها

أسئل ..............

ولا تهاب الأجابه و مرها

أهلا وسهلا بيك

أعرفك يا ابنى

الصبح .... قسطين لبن مدلوقين

الشمس ... مشمشه طابت فى قلب السما

الناس .... غياب وحضور زى أيامك

والبوسه ... طعم الحنان اللى ما شافه حد

خدها على جبينك

وفى السبوع تتهز فى الغربال

ريحة فرح وبخور

بيرفرفوا مع بعض

وانت اللى تضحك وتبكى

من غير ولا سنه

كتكوت بيغرق......

وسط الفرحه والدهشه

اهلاً وسهلاً بيك ... فى دنيتنا .